個個都話要試妝試多幾個，但試多幾個之後，又會唔記得左第一個試既妝？
平時唔化妝，唔識睇化得好唔好？
我自己就試左兩個MUA，不同style。
約試妝時間時我將最中意個個約遲幾日，原因係，因為即日confirm可以減返試妝費，咁試完第二個之後係大D機會confirm，大D機會拎得返試妝費 (笑) 。但係，如果中意個個放第一，就算好中意，都無得即時confirm，無理由唔試埋第二個架嘛。
另一個原因係，第一次試，乜都唔識，可以當攞經驗，同時可以等自己習慣濃妝既樣。因為有機會會因為唔習慣自己濃妝而覺得唔靚嘛。
==============================
平時少化妝，咁試妝時點為之好﹖ 以下係我心目中既checklist，大家參考下 =)
1) 第一位當然係整體感覺。整個style岩唔岩自己：例如會唔會化得太老 / 太年輕 / 太型 / 太豔等等
2) 之後我會睇雙眼皮膠紙，黏好後雙眼眼形會唔會怪﹖ 會唔會張開眼時見到張膠紙﹖ 雙眼係咪對稱﹖ 要知道，雙眼皮膠紙係用黎改善整個眼形 (例如大細眼)，唔係淨係用黎改善雙眼皮
3) 眉。眉妝係整個妝好重要既一部分，直接影響到整體感覺同眼形、氣息。個人雖然中意韓式一字眉，但當日既相要睇一世架嘛，不能只追潮流 (到時唔興korean style咁點算..)，所以都係以自己眉形為本既眉裝會較好。當然，兩條眉畫得越對稱越好啦~~ (須知道眉係化妝入面top3難度高的，眉畫得好既話，技巧應該唔會太差
4) 鼻影。會唔會太深睇到「一行線」﹖ (呢個睇相會較易睇到!)
5) 胭脂同shading會唔會唔夾﹖ 胭脂方面我非常追求暈開得靚到睇落要似係皮膚底層沁出黎既紅。
6) 眼睫毛。黏好後會唔會唔舒服拮眼﹖ 睫毛既角度自然嗎﹖
7) 底妝。有無乾燥脫皮情況。會唔會過白/過黑。
1) 有冇用粟米夾﹖ 用得多唔多﹖ 要知道粟米夾會令頭髮睇起黎曲曲的，影相超唔靚！
2) 有冇髮絲。太多髮絲走左出黎會令頭髮睇黎凌亂唔精神。
3) 前蔭做得自然嗎﹖ 試下唔同角度照鏡睇下自己既前蔭。
***注意點係：記得試妝要睇鏡入面既自己之餘，亦要睇拍照後 (用iphone就得啦) 既效果。因為現場睇好睇，入左相機有可能會太淡的！(咁當日影相就好似無化妝咁啦)
***另外記得，要試下笑同唔笑既效果。眼形可以好唔同架！
好。點join package又要注意什麼﹖
1) 打風落雨安排
2) 朝早幾點前，夜晚幾點後要另付OT﹖
3) 包唔包頭飾﹖
4) 包眼睫毛嗎﹖
5) 有冇姐妹化妝﹖ (如果係同一team人化，整體效果會一致D。但要注意團隊人數夠唔夠，以免時間太倉促)
以上。希望有用啦~ヾ(⌒∇⌒*)See You♪
